Solidariedade coa CGTP-IN e a clase traballadora portuguesa
Este post está disponible en:
A Confederación Intersindical mostra a súa solidariedade coa CGTP-IN e a clase traballadora portuguesa pola Folga Xeral do 3 de xuño.
A Confederación Intersindical expresa a súa solidariedade coa folga xeral convocada para o próximo 3 de xuño e coa loita que a CGTP-IN vén desenvolvendo en defensa dos dereitos das traballadoras e os traballadores portugueses.
Como organización sindical de clase, seguimos con preocupación as medidas que supoñen un novo ataque aos dereitos laborais e sociais, promovendo a precariedade, debilitando a negociación colectiva e favorecendo os intereses da gran patronal en detrimento das lexítimas aspiracións de quen vive do seu traballo.
Nun contexto marcado polo aumento do custo da vida, a perda de poder adquisitivo dos salarios e o agravamento das desigualdades sociais, consideramos inaceptable calquera intento de facer recaer sobre as traballadoras e os traballadores os custos de unhas políticas que agravan as inxustizas e debilitan dereitos conquistados ao longo de décadas de loita e organización colectiva.
A folga xeral convocada pola CGTP-IN constitúe unha resposta lexítima, necesaria e valente ante estas políticas. A defensa do emprego con dereitos, da revalorización dos salarios, da estabilidade laboral, dos servizos públicos e da negociación colectiva é unha causa común da clase traballadora en todos os países.
Por iso, queremos transmitir o noso apoio e solidariedade á CGTP-IN e ao conxunto das traballadoras e os traballadores de Portugal que participarán nesta importante xornada de loita. Reafirmamos así mesmo o noso compromiso coa solidariedade internacionalista entre organizacións sindicais de clase, convencidos de que só a través da unidade, a mobilización e a loita organizada será posible defender e conquistar dereitos para quen traballa.
Desexamos á CGTP-IN e ás traballadoras e traballadores portugueses o maior éxito nesta folga xeral e nas xustas reivindicacións que a sustentan.
Área Internacional da Confederación Intersindical.
